நீண்ட நாட்கள் ஆரோக்கியமாக, நீண்ட ஆயுளோடு இருப்பதற்கு சித்தர்கள் சில உணவு முறைகளை பரிந்துரைத்து சென்றுள்ளனர். பழமையான சித்தர்கள் பாடல்கள், சுவடிகள் போன்றவற்றின் மூலம் மனிதன் எப்படி சாப்பிட்டால் நீண்ட காலம் ஆரோக்கியத்தோடு இருக்க முடியும்? எந்தெந்த உணவுகளை சாப்பிட வேண்டும்? எந்த உணவுகளை சாப்பிடக்கூடாது? என்பதை தான் இந்த ஆரோக்கியம் சார்ந்த பதிவின் மூலம் நாம் தொடர்ந்து பார்க்க இருக்கிறோம்.
காலையில் எழுந்ததுமே காபி, டீ போன்ற பானங்களுக்கு பதிலாக துளசி டீ அல்லது சித்தரத்தை டீ அருந்துவது நல்லது என்று சித்த மருத்துவம் பரிந்துரைக்கிறது. இது நோய் எதிர்ப்பு சக்தியை அதிகரிக்கும். “காலையில் இஞ்சி, கடும் பகல் சுக்கு, மாலையில் கடுக்காய்” என்பது ஒரு பிரபலமான சித்தர் பாடல். இதன்படி, தினமும் ஏதாவது ஒரு வகையில் காலையில் இஞ்சி, மதியம் சுக்கு, இரவு கடுக்காய் என ஒரு மண்டலம் (48 நாட்கள்) தொடர்ந்து சாப்பிட்டு வந்தால் உடல் ஆரோக்கியம் மேம்படும். இது செரிமானத்தை சீராக்கி, உடலில் உள்ள கழிவுகளை நீக்கும்.
நம் பாரம்பரிய உணவான ரசத்தை தினசரி உணவில் சேர்த்துக் கொள்வது மிகவும் நல்லது. கொள்ளு, தூதுவளை, வேப்பம்பூ போன்ற பொருட்களைக் கொண்டு செய்யப்படும் ரசம் உடலுக்கு மிகுந்த பலன்களைத் தரும். “மூத்த தயிர் உண்போம்” என்று சித்தர்கள் கூறியுள்ளனர். தயிர் போன்ற புரோபயாடிக் உணவுகளைச் சேர்த்துக் கொள்வது, குடலில் உள்ள நல்ல பாக்டீரியாக்களின் வளர்ச்சியை ஊக்குவித்து, செரிமான மண்டலத்தை ஆரோக்கியமாக வைத்திருக்க உதவும். தினமும் ஒரு கப் தயிர் சாப்பிடுவது அவ்வளவு ஆரோக்கியத்தை அள்ளிக் கொடுக்கக்கூடியது. இதய நோய்கள் வராமல் தடுக்கவும் தயிர் உதவும்.
பழங்கள், காய்கறிகள், தானியங்கள், பருப்பு வகைகள், கீரைகள் போன்ற நார்ச்சத்து நிறைந்த உணவுகளை அதிகம் சேர்த்துக் கொள்ள வேண்டும். இவை உடல் இயக்கத்தை சீராக வைத்திருக்க உதவும். ஆரோக்கியமான சிந்தனைகளுக்கு ஆரோக்கியமான உணவு முறை பழக்கமும் வேண்டும். கேசம், தோல், சதை, எலும்பு போன்றவற்றை பலப்படுத்த, மண் சார்ந்த உணவுகளை அதாவது நிலத்தடியில் விளையும் கிழங்கு வகைகள், காய்கறிகள் போன்றவற்றை உண்ண வேண்டும் என்று சித்தர்கள் கூறியுள்ளனர். கொழுப்பு, இரத்தம், பித்தம் போன்றவற்றை சமநிலையில் வைத்திருக்க, நீர்ச்சத்து நிறைந்த உணவுகளை (தர்பூசணி, வெள்ளரிக்காய் போன்றவை) சேர்த்துக்கொள்ள வேண்டும். நீர் சத்துள்ள காய்கறிகளை (சௌசௌ, பூசணி) அடிக்கடி உணவில் சேர்த்துக் கொண்டு வர வேண்டும்.
எப்போதும் வாய்க்கு ருசியாக இருக்கிறது என்பதற்காக வயிறு முட்ட சாப்பிடக்கூடாது. எவ்வளவு ருசியான சாப்பாடாக இருந்தாலும், வயிற்றில் பாதி உணவு, கால் பங்கு தண்ணீர், மீதி கால் பங்கு காற்றுக்கு இடம் விடுவது அவசியம் என்று சித்தர்கள் கூறியுள்ளனர். ஒரு நாள் தானே இன்று மட்டும் சாப்பிட்டுக் கொள்ளலாம் என்று நினைக்க கூடாது. அப்படி நினைப்பவர்கள் அந்த நாளில் நடை பயிற்சி அல்லது உடற்பயிற்சி மேற்கொண்டு அதனை சமன் செய்ய வேண்டும்.
இதையும் படிக்கலாமே:
சேமிப்பு உயர உண்டியல் பரிகாரம்
பசி இல்லாத போது சாப்பிடக்கூடாது. பசித்த பிறகு மட்டுமே உணவை உட்கொள்ள வேண்டும். காலையில் கடன் கழிக்காமல் உணவு சாப்பிட கூடாது. தேனையும் நெய்யையும் சம அளவில் கலந்து சாப்பிடக்கூடாது. வாழைப்பழத்துடன் தயிர் அல்லது மோர் கலந்து சாப்பிடக்கூடாது. இவை ஒன்றுக்கு ஒன்று முரணான தன்மை கொண்டது. இந்த எளிய பழக்கவழக்கங்களைப் பின்பற்றுவதன் மூலம் நோய்கள் அண்டாமல் ஆரோக்கியமாக வாழலாம்.