உடலுக்கு தேவையான புரதச்சத்தை கொடுக்கும் இந்த மூன்று உணவு பொருட்களை அடிக்கடி சமையலில் சேர்த்துக் கொள்வது ஆரோக்கியத்திற்கு நன்மை கொடுக்கிறது.

தசைகள் கட்டமைப்புக்கு புரதச்சத்து அவசியம். உடலில் புரதச்சத்து போதுமான அளவுக்கு இருந்தால் மட்டுமே உடல் உறுதியாகும். புரதசத்தை நாம் உணவின் மூலமாகவே பெற முடியும். புரதச்சத்து தேவை நபருக்கு நபர் வேறுபடும். உடலின் எடையில், ஒரு கிலோவுக்கு 0.8 கிராம் புரதம் தேவை. 50 கிலோ எடை கொண்டவர் என்றால், 40 கிராம் தேவை. தினமும் ஏதாவதொரு வகையில் புரதச்சத்து நிறைந்த உணவு பொருட்களை சாப்பிட்டு வந்தால் உடல் உறுதியாகும். புரதச்சத்து நிறைந்த உணவைப்  பொறுத்தவரை, இறைச்சி மட்டுமே முக்கிய ஆதாரமாக இருப்பதால், சைவ உணவு உண்பவர்களுக்கு அதிக ஆப்ஷன்கள் இல்லை என்று பெரும்பாலான மக்கள் தவறாக நினைக்கிறார்கள்.  வாருங்கள் புரதச்சத்து நிறைந்த மூன்று உணவுகளை பற்றி இந்த பதிவின் மூலம் தெரிந்து கொள்வோம்.

சோயாபீனில் நான்-வெஜ்களில் இருக்கும் புரதத்தை விட அதிக புரதம் இருக்கிறது. இதில் வைட்டமின்கள் பி மற்றும் ஈ, கால்சியம், இரும்பு மற்றும் ஜின்க் மற்றும் நல்ல கொழுப்பு அமிலங்களும் உள்ளன. ஆய்வுகளின்படி, சோயாவிலுள்ள புரதம் மோசமான கொழுப்பின் அளவையும் அதிகப்படியான இரத்த அழுத்தத்தையும் குறைக்க உதவுகிறது என்று கண்டுபிடிக்கப்பட்டுள்ளது. மேலும் இது ஐசோஃப்ளேவோன்களைக் கொண்டுள்ளது. விளையாட்டு வீரர்களுக்கு புரதத்தின் தேவை அதிகம்.

அதை ஈடுகட்ட சோயா சிறந்த உணவு. மெனோபாஸ் காலக்கட்டத்தை நெருங்கும் பெண்களுக்கு ஈஸ்ட்ரோஜென் சுரப்பு குறைய ஆரம்பித்து, சினைப்பைகளின் செயல்திறனும் மங்கும். வாரத்தில் 5 நாட்கள் சோயா மில்க் எடுத்துக் கொண்டால் இந்தப் பிரச்னையிலிருந்து விடுபடலாம். புரோஸ்டேட் மற்றும் மார்பக புற்றுநோயின் அபாயத்தையும் இந்த சோயாபீன்ஸ் குறைக்கிறது.

100 கிராம் பச்சை பட்டாணியில் ஐந்து கிராம் புரதம் உள்ளது. ஆய்வுகளின்படி, பச்சை பட்டாணி பாக்டீரியா எதிர்ப்பு, பூஞ்சை காளான், அழற்சி எதிர்ப்பு, ஆக்ஸிஜனேற்ற மற்றும் ஆன்டிகான்சர் பண்புகளால் நிரம்பியுள்ளது. அவை நீரிழிவு நோயை கண்ட்ரோலாக வைத்துக்கொள்ள உதவுகின்றன. பட்டாணியில் போலிக் அமிலம் அதிகம் உள்ளது. செல்களுக்கு உள்ளே டி.என்.ஏ. தொகுப்பு இயக்கம் சீராக நடைபெற ஃபோலேட்ஸ் என்கிற பி.காம்ப்ளக்ஸ் விட்டமின்கள் அவசியம் தேவை.

பட்டாணியில் அவை உள்ளது. பட்டாணி உடலில் உள்ள கொலஸ்ட்ரால் அளவை குறைக்கிறது. கண் நன்றாக தெரிய வைட்டமின் இ மிகவும் அவசியம். உடல்வலி, தலைவலி ஆகியன ஏற்படாமலிருக்கவும் பல், எலும்பு முதலியவை உறுதியுடன் இருக்கவும் பட்டாணியில் உள்ள வைட்டமின்கள் உதவுகிறது

இந்திய பருப்பு வகைகளில் மைசூர் மற்றும் பாசிப்பருப்பு 100 கிராம் பருப்புக்கு முறையே 9 கிராம் மற்றும் 7 கிராம் புரதம் உள்ளன. அவை ஆரோக்கியமான எடை மேலாண்மை மற்றும் நீரிழிவு நோயைத் தடுப்பதற்கு உதவும் நார்ச்சத்துக்களை கொண்டுள்ளது. கடலைப் பருப்பு, துவரம் பருப்பு, உளுத்தம் பருப்பு போன்றவற்றில் 100 கிராமுக்கு 20 முதல் 25 கிராம் அளவு புரதம் இருக்கிறது. மசூர் பருப்பில் அதிக அளவு புரோட்டீன் மற்றும் பி காம்ப்ளக்ஸ் சத்துக்கள் நிறைந்துள்ளன. ஆனால், அதனுடன் சேர்த்து பருப்புக்காகக் கொடுக்கப்படும் நிறமி, நச்சுத்தன்மை வாய்ந்ததாக இருக்கிறது.  எனவே இதற்கு பதிலாக பச்சைப் பயறு / பருப்பு போன்றவற்றைப் பயன்படுத்தலாம். முளைக்கட்டிய பயிர்களில் புரதச்சத்து அதிகளவு உள்ளது. எனவே அசைவ உணவுகளை தவிர்ப்பவர்கள் தினமும் சிறிதளவு முளைக்கட்டிய பயிர்களை சமைத்து சாப்பிடலாம்