நம் குழந்தை வளரும் ஒவ்வொரு தருணமும் நமக்கு ஒரு திருவிழாதான். அதில், அவர்களின் கள்ளமில்லா சிரிப்பைக் கூட்டி, மெல்ல விழும் முதல் பற்கள்தனை “பால் பற்கள்” என்று சொல்லுவார்கள். அந்தப் பால் பற்கள், வெறும் வளர்ச்சி அடையாளங்கள் மட்டுமல்ல, அவை நம் வாழ்வின் அதிர்ஷ்டத்தைத் தீர்மானிக்கும் மந்திரப் பொருட்கள் என்று நம் முன்னோர்கள் நம்பினர்!
நம்மில் பலரும் குழந்தைக்கு முதல் பல் விழுந்ததும், அதை எங்கே போடுவது? என்ன செய்வது? என்று தெரியாமல் குழம்பிவிடுவோம். சிலர் அதைத் தூக்கி எறிவார்கள், சிலர் ஓடும் நீரில் விடுவார்கள். முன்னோர்கள் அதை வீட்டின் மேற்கூறையில் போடும்படி சொல்லுவார்கள். ஆனால், அந்தக் குட்டிப் பல்லில் ஒளிந்திருக்கும் ஒரு பெரிய இரகசியம் உங்களுக்குத் தெரியுமா? வாங்க, இந்த ஆன்மீகம் சார்ந்த பதிவின் மூலம் அந்த ரகசியத்தை நாமும் தெரிந்து கொள்வோம்.
பாரம்பரிய நம்பிக்கைப்படி, உங்கள் குழந்தையின் முதல் அல்லது ஏதேனும் ஒரு பால் பல்லை பத்திரமாக எடுத்து, அதை உங்கள் பணப் பெட்டி அல்லது பணம் வைக்கும் பர்ஸ்/கல்லா பெட்டியில் வைத்தால், உங்கள் வீட்டில் செல்வச் செழிப்பு பெருகும் என்பது ஐதீகம். பால் பற்கள் விழுவது நிரந்தரப் பற்கள் முளைப்பதற்கான ஒரு புதிய ஆரம்பம். இந்த “புதிய ஆரம்பம்” என்ற நல்ல சகுனத்தை, பணப் பெட்டியில் வைக்கும் போது, பணத்தின் வரவும் குறையாமல், புதிய வழிகளில் பெருகிக்கொண்டே இருக்கும் என்று நம்பப்படுகிறது.
குழந்தை எப்படி வளர்கிறதோ, அதே போல உங்கள் பணப் பெட்டியில் உள்ள செல்வமும் தங்கு தடையின்றி வளரும் என்பதைக் குறிக்கும் ஓர் அழகிய நம்பிக்கை இது. குழந்தையின் பல், குடும்பத்திற்கு ஒரு பாதுகாப்பு தாயத்து போலச் செயல்பட்டு, பணம் சார்ந்த பிரச்சனைகள் வராமல் காக்கும் என்றும் சொல்லப்படுகிறது. விழும் பால் பற்களைச் சாதாரணமாக வைக்காமல், ஒரு மஞ்சள் துணியில் முடிந்து, சில்லறைக் காசுகளுடன் உங்கள் பணப் பெட்டகத்தில் பத்திரப்படுத்தி வைக்கலாம். இதை ஒரு சேமிப்புப் பழக்கத்தின் தொடக்கமாகவும், உங்கள் குழந்தையின் எதிர்கால நிதி நிலைமைக்கான ஆசீர்வாதமாகவும் நீங்கள் நினைக்கலாம்.
நம் முன்னோர்கள் வகுத்து வைத்துள்ள ஒவ்வொன்றுக்கு பின்னாலும் ஒவ்வொரு அற்புதமான ஆழமான காரணங்கள் ஒளிந்திருக்கும். குழந்தையின் தொப்புள் கொடியையும் அப்படித்தான் பத்திரப்படுத்தி அதை தாயத்து செய்து ஒளித்து வைப்பார்கள். அதுபோல குழந்தையின் முதல் பால் பற்களையும் பத்திரமாக எடுத்து பணப்பெட்டியில் வைத்தால் பணம் வீட்டில் பெருகும் மற்றும் குடும்பத்தில் இருக்கும் வறுமையான சூழ்நிலைகள் மாறும் என்பது நம்பிக்கையாக இருந்து வந்தது.
இதையும் படிக்கலாமே:
செல்வம் பெருகாமல் இருக்க காரணம்
இது வெறும் நம்பிக்கையாக இருக்கலாம். ஆனால், குழந்தையின் முதல் பால் பல்லை நினைவுக் குறிப்பாய் பாதுகாப்பது எவ்வளவு மகிழ்ச்சி! அதனுடன் சேர்ந்து, நம் வீட்டின் செல்வமும் பெருகும் என்ற நம்பிக்கை இருந்தால், நமக்குள் ஒரு நேர்மறை எண்ணம் பிறக்கும் அல்லவா? உங்கள் குழந்தை பற்களை இழக்கும் அந்த இனிய தருணத்தில், இந்த எளிய இரகசியத்தைப் பயன்படுத்தி உங்கள் பணப் பெட்டியை நிரப்புங்கள்!